पाँचथर । पाँचथरको सदरमुकाम फिदिममा तीन वर्षअघि निर्माण गरिएको बसपार्क संचालन नभएको भन्दै स्थानीय आक्रोशित बनेका छन् ।

करौडौँको लगानीमा बसपार्क निर्माण गरिए पनि सञ्चालनमा नआएको भन्दै उनीहरुले जिल्ला प्रशासन कार्यालयमा ज्ञापन पत्र बुझाएका छन्। बसपार्क खाली रहेको र जथावाभी पार्किङले बजार नै अस्तव्यस्त बनेकाले बसपार्क तत्काल सञ्चालनमा ल्याउनुपर्ने उनीहरुको माग छ ।

उता, बसपार्क सञ्चालनका लागि यातायात व्यवसायी र फिदिम बजारका व्यापारीहरूले नगरपालिकालाई साथ नदिएको फिदिम नगरपालिकाका प्रमुख ओनाहाङ नेम्वाङले बताउनु भएको छ ।

बसपार्क बजारबाट डेढ किलोमिटर टाढा रहेकोले पार्किङमा जान समस्या भएको व्यवसायीहरुको भनाइ छ । फिदिम २, पल्लोटारमा स्थायी बसपार्क २०७१ साल वैशाख १ गते पहिलो पटक उद्घाटन गरिएको थियो ।

स्थानीयवासी दश जनाले निःशुल्क प्रदान गरेको नौ रोपनी जग्गामा तीन करोड लगानीमा सुविधायुक्त बसपार्क निर्माण गरिएको छ ।

निकै तामझामका साथ दोस्रो पटक उद्घाटन गरिएको फिदिम बसपार्कमा यातायात जान नमान्दा बजार क्षेत्रमा पहिलेको जस्तै सवारी चाप बढेको छ ।

काउन्टरसहितका बसपार्कका आधारभूत संरचना अहिले बसपार्कमै पु¥याइएको छ । सुरक्षाका लागि अस्थायी प्रहरी बिट नै स्थापना भएको छ । ब्यवस्थित काउण्टर राखिएको छ । खानेपानी, विद्युत्, टेलिफोनसहितका पूर्वाधार पु¥याइएको छ । बसपार्क जाने आउने सडक चौतर्फी क्लियर गरिएको छ ।

तर, पनि गाडी त्यहाँ पार्क हुँदैनन् । अधिकांस ब्यवसायीले बसपार्कका संरचना नबन्दासम्म भन्ने गरेको सुरक्षाको विषय अब छैन । अझै यहाँ सञ्चालन हुने गाडी बसपार्क पुग्दैनन् । विशेष गरेर पार्कका लागि पुग्दैनन् ।

गाडी बसपार्क नलगिँदा बजारको शौन्दर्यतामा पहिलेझैं समस्या सुरु भएको छ । सवारी दुर्घटनासहितका समस्या झनै बल्झिएको छ ।