बिर्तामोड । मेचीनगरको मुख्य व्यापारिक केन्द्र काँकरभिट्टाबाट बजार अनुगमन टोलीले बिहीबार लाखौ मुल्यका सामान जफत गरेको छ । अनुगमनको क्रममा टोलीले म्याद गुज्रिएका सामान बरामद गरेको हो । 

दशैँतिहार नजिकिँदै गर्दा अत्यावश्यक खाद्य वस्तुको मुल्य दिनहुँजसो उकालो लागेको उपभोक्ताको गुनासो आएसँगै झापाका सहायक प्रमुख जिल्ला अधिकारी त्रिलोचन रिमाल नेतृत्वको अनुगमन टोलीले काँकरभिट्टाका पसलहरुको अनुगमन गरेको थियो ।

सोक्रममा उपभोग्य मिति गुज्रिएका खाद्य वस्तु टोलीले नियन्त्रणमा लिएको मेचीनगर नगरपालिका खाद्य अधिकृत दीपेन्द्र कार्कीले बताए ।

दशैंतिहारलगायत अन्य चाडपर्वका समयमा बजारमा हुने कालोबजारी र खाद्य सामग्रीको मुल्यबृद्धि नियन्त्रण गर्न मेचीनगरमा बजार अनुगमन गरिएको सहायक प्रमुख जिल्ला अधिकारी रिमालले जानकारी दिए ।

टोलीले अनुगमनका क्रममा बिल विजक चुस्तदुरुस्त नराखेको, मुल्यसूची नराखेको, राखेको भए पनि त्यसलाई दैनिकरुपमा व्यवस्थापन नगरेको, पसलमा उपभोग्य मिति सकिएका खाद्य वस्तु फेला पारेको थियो । साथै विद्युतीय तराजुको आवश्यक कागजात नराखेको फेला परेपछि तत्काल सवै प्रक्रिया पुर्याएर आवश्यक कागजात राखी दर्ता गर्न व्यवसायीहरुलाई सुझाव दिइएको छ ।

उपभोग्य मिति समाप्त भएको फेला पारेको ती वस्तु नष्ट गर्ने जनाइएको छ । टोलीले खुद्रा व्यवसायीहरुलाई होलसेल व्यवसायीले जारी गरेको वील विजक सुरक्षित राख्न र माग गरेका बेला उपलब्ध गराउन भनेको छ ।