झापा । नेपाल माल्दिभ्समा जारी साफ च्याम्पियनसिप फुटबलको फाइनलमा प्रवेश गरेको छ । नेपाल पहिलोपल्ट साफ च्याम्पियनसिपको फाइनलमा प्रवेश गरेको हो ।

नेपालले आज भएको राउण्ड रोबिन लिगको अन्तिम खेलमा बुधबार बंगलादेशविरुद्ध बराबरी खेलेपछि नेपालले फाइनलमा स्थान सुरक्षित गरेको हो । नेपाल र बंगलादेशबीच १-१ गोलको बराबरी भएको थियो । नेपाल फाइनल प्रवेश गरेसँगै इतिहास पनि बनेको छ ।

यस अघि नेपालले साफको फाइनल खेल्न सकेको थिएन । एक गोलको अग्रता उल्टाउदै नेपालले बराबरी खेलेको हो  । मालेस्थित राष्ट्रिय रंगशालामा भएको खेलको पहिलो हाफ सकिँदा नेपालविरुद्ध बंगलादेशले १-० गोलको अग्रता बनाएको थियो । तर, खेलले रोमाञ्चक मोड लिँदा नेपालले खेलको ८८औँ मिनेटमा आएर बराबरी गोल गर्न सक्यो ।

खेलको नवौं मिनेटमा सुमन रिजाले गोल गर्दै बंगलादेशलाई सुरुआती अग्रता दिलाएका थिए । तर, खेल सकिन १० मिनेट बाँकी रहँदा वान भर्सेज वानमा बंगलादेशी गोलरक्षकले डिबक्स बाहिर आएर गोल हातले रोकेपछि रेड कार्ड पाउँदै बाहिरिन परेको थियो ।

१० खेलाडीमा सीमित रहेको बेला बंगलादेशी खेलाडीले अञ्जन विष्टलाई हेड गर्ने क्रममा डिबक्सभित्र लडाएपछि नेपालले पेनाल्टी पाएको थियो । अञ्जन विष्टले पेनाल्टीमार्फत गोल गरेपछि नेपालको फाइनल यात्रा तय भएको हो ।

यसअघि बंगलादेशका कप्तान जमल भुयानको फ्रिकिकमा रिजाले उत्कृष्ट हेड मार्फत गोल गरेर अग्रता दिलाएका थिए । पहिलो हाफमा बल पोसेसनमा पकड बनाएको नेपालले केही गोलको अवसर खेर फालेको थियो । राउण्ड रोबिन लिगको अन्तिम खेलमा नेपालले बंगलादेशविरुद्ध प्रतिस्पर्धा गरेको थियो । नेपालको लागि फाइनल यात्रा तय गर्न पनि यस खेल महत्वपूर्ण रहेको थियो ।

साफ च्याम्पियनसिपको इतिहासमा नेपाल र बंगलादेशबीच अहिलेसम्म सात खेल भएकोमा त्यसमध्ये नेपाल तीनमा विजयी रहेको छ भने चार खेल बंगलादेशको पक्षमा रहेको छ । त्यसमध्ये पछिल्ला तीन खेलमा नेपाल लगातार विजयी रहेको छ ।

समग्रमा नेपाल र बंगलादेशबीच अहिलेसम्म २३ खेल भएका छन् । त्यसमध्ये नेपाल सात खेलमा विजयी रहेको छ भने चार खेल बराबरीमा टुंगेका छन् । आजको खेलबाट पाँच खेल बराबरी भएको छ । बाँकी १२ खेलमा भने बंगलादेशले जित निकालेको छ । यी दुई टिमबीचका पहिला पाँच खेलमा नेपाल दुईमा विजयी रहेको छ । यस्तै दुई खेल बराबरीमा टुंगेको छ भने एक खेलमा बंगलादेशले सफलता चुमेको छ ।