बिर्तामोड । झापामा हिजो भएको दुईवटा फरक दुर्घटनामा परी दुई जनाको मृत्यु भएको छ । मृत्यु हुनेमा मेचीनगर १० निवासी मनिष कार्की र मेचीनगर ८ निवासी अभिषेक श्रेष्ठ रहेको प्रहरीले जनाएको छ ।

भाइटीकाको साँझ ६ः१० बजे पश्चिमबाट पूर्व जाँदै गरेको प्रदेश १–०१–०१४ प ६००७ नम्बरको स्कुटर र बिपरित दिशाबाट आउँदै गरेको नम्बर नखुलेको रातो रंगको २२० सिसिको पल्सर मोटरसाइकल बिर्तामोड ६ स्थित गिरीबन्धु टी स्टेट अगाडी ठोक्किएर दुर्घटना भएको जिल्ला प्रहरी कार्यालय झापाले जनाएको छ । उक्त दुर्घटनामा स्कुटर चालक मेनपा १० बस्ने ४२ बर्षीय डिल्ली कार्की, स्कुटरको पछाडी सवार उनका छोरा १६ बर्षीय मनिष कार्की र मोटरसाइकलको पछाडी सवार हल्दिबारी ४ बस्ने अन्दाजी बर्ष २१ को पिजेश लामा घाइते भएका थिए । दुर्घटनाबाट गम्भीर घाइते मनिषको उपचारको क्रममा बिएण्डसी हस्पिटलमा राती ९ बजे मृत्यु भएको कार्यालयका सूचना अधिकारी राकेश थापाले जानकारी दिए । दुर्घटना पश्चात मोटरसाइकल चालक हल्दिबारी ४ बस्ने अन्दाजी २५ बर्षीय नरेश तामाङ फरार रहेको र उनको खोजी भईरहेको प्रहरीले जनाएको छ ।

त्यस्तै हिजै राती ११ः३० बजे पश्चिमबाट पूर्वतर्फ जाँदै गरेको प्रदेश १–०१–०१४ प ३३४५ नम्बरको मोटरसाइकल र सोहि दिशातर्फ जाँदै गरेको प्रदेश १–०१–००१ प ३९९५ को मोटरसाइकल मेचीनगर १३ तेलिबारीमा दुर्घटना हुँदा मेचीनगर ८ बस्ने १८ बर्षीय अभिषेक श्रेष्ठको मृत्यु भएको सूचना अधिकारी थापाले बताए । दुर्घटनाबाट प्रदेश १–०१–०१४ प ३३४५ नम्बरको मोटरसाइकलको पछाडी सवार श्रेष्ठ गम्भिर घाइते भएको र उपचारको क्रममा राती १२ः३० बजे बिएण्डसी अस्पतालमा मृत्यु भएको हो । उक्त दुर्घटनामा परी मेनपा ८ का २१ बर्षीय अनिष गिरी र प्रदेश १–०१–००१ प ३९९५ नम्बरको मोटरसाइकल चालक उर्लाबारी निवासी अन्दाजी २१ बर्षीय निकेश शिवाकोटी गम्भिर घाइते भएको प्रहरीले जनाएको छ ।