बिर्तामोड  । नेपालीहरुको दोस्रो महान चाड तिहार सकिएसँगै हर्षोल्लासका साथ मनाइने छठपर्वको तयारी झापामा शुरु भएको छ । दिपावली सकिएसँगै बिषेश गरी तराई–मधेसवासीले मनाउने छठ पूजाको लागि झापाको बिरिङ किनारमा तयारी शुरु भएको हो ।

नियमित रुपमा विरिङखोलाको किनारमा मनाउने गरिएको छठ पूजा कोरोना संक्रमणका कारण विगतका दुई बर्ष रोकिएको थियो । यस बर्षभने स्वास्थ्य मापदण्ड अपनाएर मनाउने गरी तयारी शुरु गरिएको छठ समाज सेवा समिति बिर्तामोडका प्रचारप्रसार समिति संयोजक शत्रुघन रौनियारले जानकारी दिए । बिरिङ किनारमा ३ सय स्टल रहने गरि तयारी शुरु गरिएको उनले बताए । 

लक्ष्मी पूजाको चार दिनपछि अर्थात कार्तिक शुक्ल पक्षको चौथी तिथिका दिनबाट छठपर्व विधिवतरूपमा आरम्भ हुन्छ । यस बर्ष कातिक २५ गते विहिबार विहानको उदाउँदो सूर्यलाई अर्घ दिएर छठ सकिँदैछ ।

यतिबेला तराईको बजारमा छठ पूजाका लागि चाहिने सामग्री, हरिया तरकारी र फलफूल किन्नेको निकै भीडभाड देखिएको छ । खासगरी छठ पूजामा छठी मातालाई अर्पण गरिने प्रसादमा स्याउ, केरा, सुन्तला, पानी भएको नरिवल, उखु, हरियो बोडी, पानी सिङ्गडा, मुला, अदुवाको बोट पर्छन । यो समय माटो तथा बाँसका सामग्री खरिद समेत गरिन्छ ।

छठ पूजाका लागि व्रतालुहरू राती पूजा स्थानमै बस्छन भने ग्रामीण क्षेत्रमा अधिकांश व्रतालु साँझ घर फर्कछन र भोलिपल्ट बिहानै घाटमा गएर उदाउँदो सूर्यलाई अर्घ दिने गरिन्छ । यो पर्व मनाउँदा चर्मरोग निको हुने, पुत्रलाभ, आर्थिक समृद्धि तथा सुख, शान्ति प्राप्त हुने जनविश्वास छ ।