अवकासको समयमा पनि नेताहरु युवा नेताको बिल्ला भिरेर राजनीतिमा सक्रिय रहेको बेला साँच्चै उमेरले युवाहरु नेतृत्व तर्फ अग्रसर बनिरहेका छन् । चुनाव नजिकिएसँगै सबै दलको महाधिवेशन चलिरहेको छ । नेपाली कांग्रेसको महाधिवेशन नजिकिँदो छ । राजनीतिक दृष्टिकोणले महत्वका साथ हेरिने झापाको कांग्रेस पदाधिकारीमा नवीन विमली नयाँ दृष्टिकोणका साथ अगाडी बढेको बताउँछन । 

राजनीतिमा युवाहरुको आकर्षण कम रहेको बेला देशका खम्बाको रुपमा रहने युवाहरुलाई सहभागी गराई समृद्ध राष्ट्र निर्माणमा लाग्ने योजनका साथ आफू अघि बढेको उनको भनाई छ ।  जोश, जाँगर एवम् रचनात्मक सोचका साथ हरदम केही नयाँ र केही फरक काम गरौं भन्ने हुट्हुटी उनमा छ । समाज र राष्ट्रहितका लागि निरन्तर पहल गर्न उद्यत युवा वर्ग नै वस्तुतः राजनीतिका अभियन्ता बन्नुपर्ने समयको माग र आजका दिनमा युवा वर्ग नै नेपाली राजनीतिका विश्वस्त अभियन्ता बन्न सक्छन् भन्ने मान्यता विमलीमा रहेको छ ।

आफूलाई विद्यार्थी राजनीतिबाट मुलधारको राजनीतिमा प्रवेश गराएको बताउने विमली २०५७ सालमा १८ वर्षको उमेरमै मेची बहुमुखी क्याम्पस, नेपाल विद्यार्थी संघको इकाई सदस्य भएका थिए । त्यसपछि नेविसंघको सहसचिव, सचिव, सभापति हुँदै क्षेत्रीय सचिव र सभापति, झापा जिल्ला सचिव र ५ वर्ष जिल्ला सभापति रहेर निरन्तर नेतृत्व क्षमतामा आफूलाई अब्बल सावित गरिसकेका छन् विमलीले ।

त्यसयता २०६२/०६३ को लोकतान्त्रिक आन्दोलनमा होमिएका उनी पटक–पटक पक्राउ परे । जस्तोसुकै असहज परिस्थितिमा पनि निडर भएर राजनीतिक मोर्चामा डट्नु उनको हक्की स्वभावको परिचय बनेको छ । आजसम्मको त्यही निरन्तरता, सहभागिता र संघर्षले उनको छवि निर्माण गरेको छ । राजनीतिक संघर्षबाट पछि नहट्ने र त्यसलाई परिणाममुखी बनाउन लागिपर्ने उनको हक्की स्वभावले जिल्लाको कांग्रेस राजनीतिमा उनलाई आफ्नै पहिचान स्थापित गरिरहेको छ ।

यही मंसीर ६ गते सम्पन्न नेकांको महाधिवेशन प्रतिनिधि समेतमा निर्वाचित नवीन भन्छन्– ‘मेरो अबको लक्ष्य भनेको पार्टीको जिल्ला सचिवमा उम्मेदवार बन्ने हो ।’

राजनीतिक यात्रामा आफ्ना कुरा स्पष्ट, दृढतापूर्वक र परिपक्व ढंगले राख्ने उनी राजनीतिमा अक्सर देखिने लप्पनछप्पन, चाप्लुसी र अर्काको बद्ख्वाइँ गरेर आफू मपाईं बन्न खोज्ने शैली विरुद्ध उनको स्वभाव छ । उनले आफू अहिलेसम्म आफ्नै बलबुतामा संघर्षमा होमिएरै यहाँसम्मको राजनीतिक यात्रा तय गरिरहेका छन् ।

अबका दिनमा आफ्नो लक्ष्य महामानव नेपाली कांग्रेसका संस्थापक बीपी कोइरालाको राजनीतिक दर्शनलाई मूलमन्त्र मानेर व्यावहारिक राजनीतिमा जोडिने रहेको बताउने युवा राजनीतिकर्मी नवीन ‘पार्टीमा पुरानो पुस्ताको योगदान र अनुभवलाई मार्गदर्शन मानेर नयाँ पुस्तालाई राजनीतिमा युगसापेक्ष रूपान्तरणमा सरिक गराउन दत्तचित्त हुने सोचमा आफू रहेको’ बताउँछन् ।