इलाम । नेकपा एमाले इलाम जिल्ला कमिटीको जिम्मेवारी हेरफेर गरिएको छ । शनिबार बसेको सचिवालय बैठकले जिम्मेवारी हेरफेर गरेको हो । सचिवालय बैठकले अध्यक्षमा महेश बस्नेतलाई चयन गरेको छ ।

भर्खरै सम्पन्न नेकपा एमालेको १०औँ महाधिवेशनबाट अध्यक्ष रामबहादुर राना केन्द्रीय सदस्यमा निर्वाचित भएपछि जिल्ला कमिटी अध्यक्षको जिम्मेवारी बस्नेतलाई दिइएको हो । बस्नेत यस अघि जिल्ला सचिव थिए । उपाध्यक्ष भक्त केसी नेकपा एकीकृत समाजवादीमा लागेपछि सचिवले नेतृत्व लिनु परेको एमालेले जनाएको छ ।

त्यस्तै, आजैबाट संगठन विभाग प्रमुखको जिम्मेवारी उमेश गुरुङ, प्रचार विभागको प्रमुखमा प्रकाश अधिकारी, बुद्धिजीवी परिषद्को प्रमुखमा नरेन्द्रनाथ भट्टराई, अर्थ विभागको प्रमुखमा डा. देवी क्षेत्री दुलाललाई दिएको छ । यसभन्दा पहिलो संगठन विभागको प्रमुखमा महेश बस्नेत र प्रचार विभागको प्रमुखमा उमेश गुरुङ रहेका थिए ।

यस्तै, आजकै बैठकले अखिल नेपाल महिला संघको सह–इञ्चार्जमा रिपल राई, खेलकुद महासंघमा दीपक गौतम, सूर्योदय नगरपालिकाको इञ्चार्जमा महेश बस्नेत, इलाम क्षेत्र नं. २ को इञ्चार्जमा नरेन्द्रनाथ भट्टराई, बुद्धिजीवी परिषद्को अध्यक्षमा नरेन्द्रनाथ भट्टराई तोकेको जनाइएको छ ।