बिर्तामोड । झापाको झापा गाउँपालिकामा सम्पन्न अन्तरपालिका स्तरीय अध्यक्ष कप क्रिकेटको उपाधी मेचीनगर नगरपालिकाले हात पारेको छ । मेचीनगरले झापा गाउँपालिकालाई हराउँदै उपाधी हात पारेको हो ।

झापा गाउँपालिका–७ स्थित जनकल्याण माविको खेल मैदानमा बिहीबार सम्पन्न फाइनल खेलमा मेचीनगरले ९२ रनले झापालाई पराजित गरेको हो । टस हारेर ब्याटिङ गरेको मेचीनगरले निर्धारित २० ओभरको खेलमा ७ विकेट गुमाएर २०० रन बनाएको थियो ।

२०१ रनको विजयी लक्ष्य पछ्याएको झापाले १७ दशमलब १ ओभरमा सबै विकेट गुमाउँदै १०८ रन मात्र बनाएको थियो ।

मेचीनगरको तर्फबाट व्याट्स म्यान क्षितिज पोर्तेल ले ६५ बलमा सेन्चुरी पुरा गर्दै १०२ रन, सुरज केसीले २७ बलमा ४० रन र राजु बिश्वकर्माले ४ बलमा ११ रन जोडे । झापाको बलिङ तर्फ सज्जाद आलमले २ विकेट,प्रदिप कुमारले ३ विकेट र अंकित दासले २ विकेट लिएका थिए ।

त्यस्तै दोस्रो इनिङ्गमा झापाको व्याट्स म्यान दुखिया राजंबंशीले २८ रन, सज्जाद आलमले १५ रन बनाए भने अरु व्याट्स म्यानहरुले उल्लेख्य अंक जोड्न सकेनन ।बलिङ तर्फ मेचीनगरका प्रेम सिंहले ३ विकेट, राज थापाले १ विकेट, राजु बिश्वकर्माले २ विकेट र संदिप ढुंगानाले १ विकेट लिए ।

खेलको विजेता बनेको मेचीनगरले ४० हजार नगद सहित ट्रफी, मेडल र प्रमाणपत्र प्राप्त गरेको छ । त्यस्तै उपविजेता टिम झापाले नगद २५ हजार सहित ट्रफी, मेडल र प्रमाणपत्रमा चित्त बुझाएको छ । खेलमा म्यान अफ द म्याच, वेस्ट व्याट्समेन र म्यान अफ द सिरिज मेचीनगरका क्षितिज पोर्तेल घोषित भए । त्यस्तै प्रतियोगितामा वेस्ट वलर बाह्रदशीका अल्मास आलम, वेस्ट विकेट किपर झापाका संजय पौडेल र फेयर प्ले अवार्ड सगरमाथा युथ क्लब घोषित भयो ।