बिर्तामोड । झापाको चारपाने राजगढ सडकखण्ड अन्तर्गत बाह्रदशी ३ त्रिवेणी चोकमा शनिबार विहान भएको दुर्घटनामा परी एक जनाको मृत्यु भएको छ । विहान ७ बजे उत्तरबाट दक्षिण तर्फ जाँदै गरेको प्र. १–०१–००१ ख ३५२४ नम्बरको बस र विपरित दिशाबाट आउँदै गरेको मे १ च २२२६ नम्बरको भ्यान एक आपसमा ठोक्किँदा भ्यान चालक बाह्रदशी १ भागडुब्बाका ३४ बर्षीय मिलन भनिने प्रमोदचन्द्र उप्रेतीको मृत्यु भएको प्रहरीले जनाएको छ ।

दुर्घटनाबाट घाइते उप्रेतीको उपचारको क्रममा बीएण्डसी अस्पताल बिर्तामोडमा मृत्यु भएको र शव अस्पतालमा रहेको जिल्ला प्रहरी कार्यालय झापाका प्रवक्ता वसन्त पाठकले जानकारी दिए । भ्यानमा सवार सोही स्थानका ५५ बर्षीया गिता घिमिरे, ५५ बर्षीया कुमारी निरौला, २१ बर्षीया रञ्जिता निर्राला, १७ बर्षीया दुर्गा घिमिरे र कचनकवल १ बस्ने १२ बर्षीय विशाल पौडेल घाइते भएको र अस्पतालमा उपचार भइरहेको उनले बताए । घाइते मध्ये दुर्गा घिमिरेको हात र दुवै खुट्टा भाँचिएको प्रहरीले जनाएको छ ।

बस चालक बाह्रदशी ६ निवासी अन्दाजी ३४÷३५ बर्षको हर्कबहादुर विक इलाका प्रहरी कार्यालय घैलाडुब्बाको सम्पर्कमा आएको र जिल्ला प्रहरी कार्यालय पठाउने तयारी भइरहेको प्रहरीले जनाएको छ ।