इलाम । इलामको फाकफोकथुम गाउँपालिकाले पहिरोपीडित परिवारलाई नगद सहयोग गरेको छ । गत कात्तिक पहिलो हप्ता आएको बेमौसमी वर्षाका कारण फाकफोकथुम गाउँपालिकाम जनधनको क्षति भएको थियो ।

पहिरोका कारण परिवारका सदस्य गुमाएका परिवारलाई गाउँपालिकाले चार लाख रुपैँयया सहयोग गरेको छ । गाउँपालिका अध्यक्ष राम श्रेष्ठ, उपाध्यक्ष सरु राई र वडाध्यक्ष राजु पौडेलले नैनसिंह कटुवाल परिवारको घरमै पुगेर सो रकम हस्तान्तरण गरेका छन । पहिरोका कारण कटुवाल परिवारका चार जनाको मृत्यु भएको थियो । साथै गाउँपालिकाको तर्फबाट घर निर्माणका लागि रु एक लाख थप सहयोग गर्ने गाउँपालिकाले जनाएको छ ।

सरकारले पहिरोका कारण मृत्यु भएका परिवारलाई यसअघि नै प्रतिमृतक दुई लाख रुपैँया नगद सहयोग गर्ने घोषणा गरेको छ । बेमौसमी वर्षासँगै आएको पहिरोले पुरेर कात्तिक २ र ३ गते फाकफोकथुम–३ का एकै घरका चार जनाको मृत्यु भएको थियो । सो परिवारलाई राहत वितरण भइसकेको छ । फाकफोकथुम– १ का दुई जना मृतकका परिवारलाई पनि राहत दिने तयारी भइरहेको पालिकाले जनाइएको छ । बाढीपहिरोमा परी फाकफोकथुम गाउँपालिकामा मात्र छ जनाले ज्यान गुमाएका थिए । पहिरोका कारण फाकफोकथुम–३ का ८६ वर्षीय नैनसिंह कटुवाल, ७५ वर्षीया रणजता थापा, १५ वर्षीया निशाना कटुवाल र १२ वर्षीय निश्चित कटुवालको मृत्यु भएको थियो । त्यस्तै फाकफोकथुम–१ का ३० वर्षीया बिना शेर्मा, १४ वर्षीय आइतबहादुर राईको पनि पहिरोका कारण मृत्यु भएको थियो । जिल्लामा पहिरोका कारण १५ जनाको ज्यान गएको थियो । यसअघि नै पीडितको घरमै पुगेर सरकारको तर्फबाट राहत वितरण भइसकेको छ ।