बिर्तामोड । झापाको मेचीनगर ७ पिपलचोकमा वुधबार साँझ भएको आगलागीमा परि एक जनाको मृत्यु भएको छ । आगो निभाउने क्रममा अन्य १२ जना घाइते भएको प्रहरीले जनाएको छ ।

पिपल चोकस्थित केशव पाठकको कच्ची घरमा आगलागी हुँदा निभाउने क्रममा मेचीनगर ८ बस्ने ४५ बर्षीय शारद राजवंशीको मृत्यु भएको जिल्ला प्रहरी कार्यालय झापाले जनाएको छ । आगलागीबाट घाइते भएका राजवंशीलाई उपचारका लागि धुलावारीस्थित एन्जल मेडिकल पुर्याउनसाथ मृत्यु भएको थियो ।

कार्यालयका प्रवक्ता वसन्त पाठकका अनुसार घरमा कोहि नभएको समयमा अचानक आगलागी भएर ग्यास सिलिण्डर पड्कँदा आगो निभाउन गएका सोहि स्थानका ४० बर्षीय लेखनाथ तिमल्सिना, बिर्तामोड ९ का २९ बर्षीय गोविन्दप्रसाद राजवंशी, मेचीनगर ७ का ३२ बर्षीय दिपेन्द्र कार्की, ३८ बर्षीय चन्दन गौतम, ४० बर्षीय सुबलाल राजवंशी, ३५ बर्षीय विनोद गिरी, ३५ बर्षीय नवराज श्रेष्ठ, २३ बर्षीय सन्देश बोहोरा, ३६ बर्षीय निर्मल शर्मा र मेचीनगर ८ बस्ने ३४ बर्षीय हरी विक घाइते भएको र बिएण्डसी अस्पताल बिर्तामोडमा उपचार भइरहेको छ । त्यस्तै, मेचीनगर ७ का ४० बर्षीय भवानीशंकर न्यौपानेको बिर्तासिटी अस्पतालमा उपचार भइरहेको छ भने मेचीनगर ८ बस्ने अर्जुन अधिकारीको छोरी ८ बर्षीया शुसिला अधिकारीको स्थानीय शाही सुमिरन मेडिकल इटाभट्टामा उपचार पश्चात डिस्चार्ज भएको प्रहरीले जनाएको छ ।

पाठकको घरमा रामेछाप घर भएका कुमार पाण्डे भाडामा बस्दै आएको र आगलागीको कारण खुल्न बाँकी रहेको प्रवक्ता पाठकले बताए ।

मेचीनगर नगरपालिकाको दमकल, प्रहरी र स्थानीयबासीको सहयोगमा राती १०ः२० मा आगलागी नियन्त्रणमा लिइएको प्रहरीले जनाएको छ ।