काठमाडौं । सिटामोल लुकाउने फार्मेसीलाई वाणिज्य, आपूर्ति तथा उपभोक्ता संरक्षण विभागले जरिवाना गरेको छ । बजारमा अभाव भएको भन्दै बिरामी ग्राहकलाई सिटामोल बिक्री नगर्ने गोसाइकुण्ड स्वास्थ्य सेवा केन्द्रलाई सातदोबाटोलाई १० हजार रुपैयाँ जरिवाना गरिएको विभागले जनाएको छ ।

विभागको छड्के कारवाही क्रममा ग्राहकलाई सिटामोल छैन भनेको फार्मेसीको गोदामा भने सिटामोल भेटिएको विभागका निरिक्षण अधिकृत धनेश्वर पौडेलले बताए । ‘केही दिनदेखि बजारमा सिटामोलको माग उच्च भएपछि फार्मेसीले छैन भन्दै ग्राहक फर्काउन थालेका रहेछन्,’ पौडेलले भने, ‘तर, गोदाममा भने सिटामोल भेटियो ।’

कोरोना संक्रमण बढेका बेला सिटामोल अभाव देखिएको छ । विभागले भने आपूर्ति चक्रमा केही समस्या भएका कारण केही स्थानमा सिटामोल अभाव भएको बताएको छ । उत्पादक कम्पनीहरुले हालै ५ करोड ८० लाख ट्याबलेट सिटामोल बजार पठाएको विभागका महानिर्देशक नारायणप्रसाद ढकालले बताए ।

नेपालमा एक सरकारीसहित १९ वटा कम्पनीले सिटामोल उत्पादन गर्छन् । ढकालका अनुसार उत्पादकसँग १५ लाख ट्याबलेट र ३ करोड ५२ लाख ट्याबलेटका लागि कच्चा पदार्थ मौज्दात रहेको जानकारी उत्पादकले दिएका छन् ।

विभागमा बुधबार भएको छलफलमा सबै उत्पादकहरुले सिटामोल उत्पादन पूर्ण क्षमतामा थाल्न सहमत भएकाले बजारमा सिटामोल अभाव नहुने महानिर्देशक ढकालले दाबी गरे ।

छलफलमा सरकारी स्वमित्वको नेपाल औषधि लिमिटेडसहितका उत्पादकले मौज्दातमा रहेको १५ लाख ट्याबलेट सिटामोल दुई दिनमा बजार पठाउने प्रतिबद्धता जनाएका छन् ।

नेपाल औषधि लिमेटेडका महाप्रबन्धक मोहम्मद सफीउल्लाहका अनुसार कम्पनीले ९ लाख ट्याबलेट सिटामोल दुई दिनमा बजारमा पठाउने गरी काम गरिरहेको छ । प्रदेश सरकार र केन्द्रिय सरकारको मागअनुसारको सिटामोल दिन कम्पनी तायार रहेको पनि उनले बताए ।

नेपाल औषधि व्यवसायी संघका अध्यक्ष मृगेन्द्र मेयर श्रेष्ठका अनुसार सबै उत्पादक कम्पनीले आफूले सक्ने जति सिटामोल उत्पादन गर्न पनि सहमत भएका छन् ।