सुर्खेत । प्रशव पिडामा छ्टपटाइरहेकी महिलाको उद्वार गर्ने क्रममा नेपाली सेनाको हेलिकप्टरभित्र एक बच्चाको जन्म भएको छ । मुगु जिल्लादेखि सुर्खेत लैजाने क्रममा मुगु खत्याड गाउँपालिका ४ जुका गाउँकी २० वर्षीया धनलक्ष्मी रावलले छोरा जन्माएकी हुन्।

नेपाली सेनाका मेजर बिलिना मल्लका अनुसार पाइलट प्रमुख सेनानी रत्नचन्द्र श्रेष्ठले गर्भवतीको उद्वार गरेका थिए । उनले भनिन्,‘सेनाको हवाई वेस क्याम्प सुर्खेतबाट गएको हेलिकप्टरले धनलक्ष्मीको उद्वार गरेको थियो । आमा र बच्चाको अवस्था सामान्य रहेको छ ।’ उनीहरुको प्रदेश अस्पताल सुर्खेतमा उपचार भइरहेको छ । सेना दिवसमा मानवीय उद्वार नमुनाको सेवा भएको नेपाली सेनाले जनाएको थियो ।

गर्भवतीलाई व्यथा लागेको १८ घण्टा भइसकेको थियो । बच्चा उल्टो बसेर सुत्केरी हुन सकेको थिएन । अवस्था निकै गम्भीर थियो । जतिसक्दो चाँडो अस्पताल पुर्याउनु पर्ने थियो, मेजर मल्लले भनिन्,‘हेलिकप्टर गर्भवती ल्याएर उडेको ३० मिनेटमा दैलेख जिल्लाको आकाशमा बच्चा जन्मिएको हो । महिला तथा बालबालिका जेष्ठ नागरिक मन्त्रालय राष्ट्रपति महिला उत्थान कार्यक्रम समन्वय इकाइको समन्वयमा नेपाली सेनाले गर्भवतीको हवाइ उद्वार गरेको थियो ।

गर्भवतीका पति पञ्चलाल रावलले नेपाली सेनाको हेलिकप्टरले पत्नीको पुर्नजन्म दिएको भन्दै खुसी व्यक्त गरे ।