बिर्तामोड । सरकारले अभियानको रुपमा टाइफाइड बिरुद्धको खोप (टाइफिबेभ) लगाउदैँछ । आगामी चैत्र २५ गतेदेखि संचालन हुने अभियानमा झापाका २ लाख १५ हजार ३५० बालबालिकालाई खोप लगाइने भएको हो ।

स्वास्थ्य कार्यालय झापाले बुधबार बिर्तामोडमा संचारकर्मीहरुसँग अन्तर्कृया गर्दै विद्यालय जाने उमेर समुहका १ लाख ४७ हजार ५८० जना र विद्यालय जाने उमेर नभएका ३७ हजार १५५ जना बालबालिकालाई यो खोप लगाइने स्वास्थ्य कार्यालय झापाका खोप अधिकृत इश्वरी पौडेलले जानकारी दिए । पौडेलका अनुसार १५ महिनादेखि १५ बर्ष उमेरसमुहका बालबालिकालाई यो खोप लगाइने छ ।

झापामा शिवसताक्षी र गौरादह नगरपालिकामा दोश्रो चरणमा बैशाख ५ देखि १० गतेसम्म र अन्य पालिकाहरुमा पहिलो चरणमा चैत्र २५ देखि ३० गतेसम्म खोप अभियान संचालन गरिने पौडेलले जानकारी दिए । झापाका ६९० खोप केन्द्रमार्फत बालबालिकालाई खोप लगाइने उनले बताए ।

फोहोर खानेकुरामा भएको ब्याक्टेरियाका कारण हुने टाइफाइड रोगलाई प्राण घातक रोगको रुपमा विश्व स्वास्थ्य संगठनले लिएर अभियानको रुपमा खोप संचालन गर्न लागिएको हो । नेपालका अस्पतालमा भर्ना हुने बिरामी मध्ये टाइफाइडका रोगी चौथो नम्बरमा पर्दछन । प्रत्येक बर्ष ४ लाख ५० हजार मानिस टाइफाइडबाट संक्रमित हुने गरेको तथ्याङ्क पाइन्छ ।

सरकारले हालसम्म नियमित संचालन गर्दै आएको १२ वटा खोपमा १३औँ खोपको रुपमा टाइफाइड बिरुद्धको खोपलाई थप गर्न लागेको हो । यो अभियान पश्चात् सरकारले १५ महिनाको उमेरमा नियमित खोपको रुपमा टाइफाइड बिरुद्धको खोप दिने भएको हो । सबै उमेरका लागि यो रोगको संक्रमण हुने भएपनि १५ बर्षमुनिका लाई ११ गुणा बढी संक्रमण हुने जोखिम हुन्छ । मुलुकभर चैत्र २५ देखि बैशाख १८ गतेसम्म सञ्चालन हुने खोप अभियानमा करिब ७५ लाख मानिसलाई यो खोप लगाउने सरकारको तयारी छ ।