हल्दिबारी । झापा हल्दिबारी गाउँपालिका वडा नम्बर ४ मितेरी टोलका सबै र आमराघुट्टु टोलका स्थानीय नेकपा माओवादी केन्द्रमा प्रवेश गरेका छन् । नागरिकता दिलाएर नेपालको नागरिक बनाउने नै माओवादी केन्द्र भएको भन्दै स्थानीयहरु माओवादी केन्द्रमा प्रवेश गरेका हुन् ।

नेकपा माओवादी केन्द्र हल्दिबारी वडा नम्बर–४ ले आयोजना गरेको पार्टी प्रशिक्षण कार्यक्रममा मितेरी टोलका सबै र आमराघुट्टु टोलका केहि स्थानीय अन्य पार्टी परित्याग गरी माओवादी केन्द्रमा प्रवेश गरेका थिए । राज्यबाट उपेक्षित सिमान्तकृत सन्थाल, आदिवासी तथा कथित दलितहरुको बसोबास रहेको उक्त टोलका करिब ४० जना स्थानीय माओवादी केन्द्रमा प्रवेश गरेको क्षेत्र नम्बर ३ का माओवादी केन्द्रका संयोजक भवानी दंगालले जानकारी दिए ।

नेपाली नागरिक भएपनि नागरिकता विहिन हुँदा विभिन्न समस्या झेल्नुका साथै सरकारी सुविधाबाट बञ्चित भएर बसेको अवस्थामा माओवादी पार्टीकै कारण नागरिकता प्राप्त गर्न सकिएको भन्दै स्थानीयहरु माओवादी केन्द्रमा प्रवेश गरेका थिए । नवप्रवेशीहरुलाई पार्टीको जिल्ला सहइन्चार्ज ज्योतिसिं दर्लामी, संविधानसभा सदस्य तथा पार्टीका जिल्ला सचिव मोहन टुडु ‘सरोज’, क्षेत्र नम्बर ३ का पार्टी संयोजक भवानी दंगाल लगायतले अबिर तथा खदा लगाएर स्वागत गरेका थिए ।

‘हाम्रो नागरिकता भयो, माओवादी राम्रो लाग्यो,’ स्थानीय प्रेम पुरकुटीले भने,‘गरिब दुःखीले नागरिकता पाए, शिक्षा पाए, रोजगारी पाए ।’ जनताको दुःखमा माओवादीले साथ दिएकाले पार्टीमा प्रवेश गरेको पुरकुटीको भनाई छ ।

पार्टीका अर्का नवप्रवेशी पवित्रा तोलाङ्गीको भनाईपनि उस्तै थियो । गरिब दुःखीको पक्षमा माओवादीले मात्र काम गर्छ भनेर प्रवेश गरेको हुँ,’ तोलाङ्गीले भनिन् । अरु पार्टीले गरिबको लागि काम गर्छ भन्ने नलागेको उनको भनाई थियो ।

 

मन्दिरमा झुक्याएर एमाले प्रवेश गरेको हल्ला चलाए : मान्युङ्ग

माओवादीका जनमुक्ति सेनामा सेक्सन कमाण्डर भएर करिब ५ बर्ष काम गरेका हल्दिबारी–२ का सन्तबहादुर (सन्तोष) मान्युङ्गले आफू मन्दिरमा गएको बेला त्यहाँ कार्यक्रम गरिरहेको नेकपा एमालेका कार्यकर्ताहरुले आफूलाई एमाले प्रवेश गरेको भनेर अफवाह फैल्याएको भन्दै आक्रोश व्यक्त गरे । ‘माओवादी पार्टीमा गरेको त्यत्रो योगदान बिर्सन सकिँदैन,’ मान्युङ्गले भने । करिब २ हप्ता अगाडी स्थानीय दुर्गा मन्दिरमा गएको बेला फोटो खिचेर एमालेका कार्यकर्ताले पार्टी प्रवेश गरेको भन्दै भाइरल बनाएको उनको भनाई छ ।

प्रशिक्षण कार्यक्रममा बोल्दै संविधान सदस्य तथा पार्टीका जिल्ला सचिव टुडुले राज्यकै कारण सन्थालहरु खोला तथा जंगल छेउ र विकट भूभागमा बस्न बाध्य हुनु परेको बताउँदै मिठो आश्वासन दिएर हिड्ने दलको पछि नलाग्न आग्रह गरे । नेकपा माओवादी केन्द्र सबै दलित, उत्पीडित , दलित, आदिबासी, जनजाति, सिमान्तकृत जनताको पक्षमा काम गर्ने पार्टी भएको भन्दै पार्टी प्रवेश गरेकाहरुलाई धन्यवाद दिए । तुर्सा हेमरमको उदाहरण दिँदै टुडुले नेकपा माओवादीकै कारण सन्थाल समुदायको भएरपनि आफू संविधानसभा सदस्य भएको र यो पार्टीले सिंगो सन्थाल समुदायलाई दिएको सम्मान भएको बताए । टुडुले आफ्नो पार्टीका जनप्रतिनिधीले हल्दिबारी–२ मा गरेको उदाहरणीय जनमुखी कामहरुको चर्चा गरेका थिए ।

कार्यक्रममा सन्थाल समुदायको संस्कृति झल्काउने झाँकी प्रस्तुत गरिएको थियो । सन्थाल समुदायका अगुवा स्थानीय ‘माझी हडम’ सरकार किस्कुको अध्यक्षतामा भएको कार्यक्रममा नेकपा माओवादी केन्द्र हल्दिबारीका इञ्चार्ज राजेन्द्र योङहाङ, अध्यक्ष दिपक खरेल, गाउँ कमिटि सचिव जितबहादुर राजवंशी, वडा नम्बर ४ का अध्यक्ष उमेश विमली, विक्रम विक, टिका राउत, खगेन राजवंशीलगायत कार्यकर्ताहरुको उत्साहजनक सहभागिता रहेको थियो ।