बिर्तामोड । वैशाख ३० गते हुने स्थानीय तह निर्वाचनका लागि मनोनयनको पहिलो दिन झापामा ७ सय ९५ जनाले मनोनयन दर्ता गराएका छन् । पालिका प्रमुखमा ४० जना र उपप्रमुखमा ३९ जनासहित ७९५ जनाले मनोनयन दर्ता गराएका हुन् ।

सबैभन्दा बढी भद्रपुरमा प्रमुख ५ उपप्रमुख ४ सहित ११५ जना र बिर्तामोडमा प्रमुख ५ उपप्रमुख ४ सहित ११५ जनाले मनोनयन दर्ता गराएको जिल्ला निर्वाचन कार्यालय झापाले जनाएको छ । कार्यालयका प्रमुख तुलसी नेपालका अनुसार शिवसताक्षीमा २ प्रमुख र १ उपप्रमुख सहित ८५ जना, दमकमा ५ प्रमुख र ४ उपप्रमुखसहित ६८ जनाले उम्मेदवारी दर्ता गराएका छन् । मेचीनगरमा ४ प्रमुख र ३ उपप्रमुखसहित ६६ जना, गौरीगञ्जमा २ अध्यक्ष र ३ उपाध्यक्षसहित ५३ जना, कचनकवलमा ३/३ अध्यक्ष र उपाध्यक्षसहित ४९ जना, गौरादहमा १/१ प्रमुख र उपप्रमुख सहित ४८ जनाले उम्मेदवारी दर्ता गराएका छन् ।

त्यस्तै, कनकाईमा ३  प्रमुख र २ उपप्रमुखसहित ४६ जना, अर्जुनधारामा १ प्रमुख र २ उपप्रमुखसहित ४१ जना, हल्दिबारीमा १ अध्यक्ष र २ उपाध्यक्षसहित ३२ जना, बाह्रदशीमा ३ अध्यक्षसहित ३२ जना, बुद्धशान्तिमा १/१ अध्यक्ष र उपाध्यक्षसहित १५ जनाले मनोनयन दर्ता गराएको प्रमुख निर्वाचन अधिकृत नेपालले जानकारी दिए । झापामा सबैभन्दा कम २ अध्यक्ष र १ उपाध्यक्षसहित कमल गाउँपालिकामा १२ जनाले मनोनयन दर्ता गराएको नेपालले बताए ।

झापाका १३१ वडाको वडाध्यक्षका लागि १९६ जना, महिला १४३, दलित सदस्य २८२ जनाले मनोनयन दर्ता गराएको निर्वाचन कार्यालयले जनाएको छ । कार्यालयका अनुसार सबैभन्दा कम दलित महिला सदस्यमा १०३ जनाको मात्र उम्मेदवारी दर्ता भएको छ ।