बिर्तामोड । बिर्तामोड नगरपालिकामा भइरहेको मत गणना रोकिएको छ । मत गणनामा करारका कर्मचारी प्रयोग भएको र स्वच्छ गणना नभएको भन्दै गठबन्धन दलका प्रतिनिधीहरुले आशंका जनाएपछि मत गणना रोकिएको हो ।

‘हिजैदेखि गठबन्धन दलका प्रतिनिधिलाई भित्र प्रवेशमा नै टाइट गरिएको थियो,’ नेकपा माओवादी केन्द्र बिर्तामोडका नगर सचिव गणेश कालिकोटेले भने,‘सबै सेटिङमा कर्मचारी प्रयोग गरेर मत प्रभावित पार्न खोजिएको हाम्रो आशंका छ ।’ ‘सबै कर्मचारीको सेट परिवर्तन नगरिएसम्म मत गणना गर्ने बिषयमा हाम्रो सहमति हुँदैन,’ उनले भने । बेलुका व्यालेट बक्स राखिएको स्थानमा नेकपा एमालेका प्रतिनिधिलाई निर्वाध जान दिइएको तर गठबन्धनका प्रतिनिधि जानलाई रोक लगाइएको उनले बताए । उनका अनुसार शनिबार विहान मत गणना सुरु भएपश्चात पनि गठबन्धनका प्रतिनिधिलाई कडाई गरिएको भन्दै विरोध भएको थियो ।

बिर्तामोडका निर्वाचन अधिकृत डम्बरप्रसाद काफ्लेले मत गणना अहिलेलाई रोकिएको स्वीकार गरे । वास्तविकता बुझ्ने कार्य भइरहेको जनाउँदै काफ्लेले समस्या भए समाधान गरेर गणना प्रक्रिया सुचारु गरिने बताए । मत गणना केहि प्रभावित भएको भन्ने खबर आएको र नयाँ कर्मचारीको सेट व्यवस्थापनका लागि काम भइरहेको जिल्ला निर्वाचन कार्यालय झापाका प्रमुख तुलसीप्रसाद नेपालले जानकारी दिए ।