बिर्तामाण्डौ । काठमाण्डौमा जारी मतगणनाको पछिल्लो परिणाम अनुसार बालेन साह (बालेन्द्र) २० हजार मतले अगाडी छन् । यो समाचार तयार पार्दासम्म बालेनले ५४ हजार ७१८ मत प्राप्त गरेका छन् । उनका निकटतम प्रतिद्वन्दी नेपाली कांग्रेसकी सिर्जना श्रेष्ठको ३४ हजार ६०८ मत रहेको छ ।

काठमाण्डौ महानगरको प्रमुखमा स्वतन्त्र उम्मेदवारी दिएका बालेन पेशाले इञ्जिनियर हुन् । उनी इञ्जिनियरिङसँगै गायन क्षेत्रमा समेत संलग्न छन् । साह काठमाण्डौका युवाहरुमा र्यापरको रुपमा परिचित छन् । लौरो चुनाव चिन्ह पाएका बालेनको यतिबेला सर्वत्र चर्चा भइरहेको छ ।

चुनावको मुखमा एक कार्यक्रममा सहभागी एक महिलासँगको संवादको बिषयलाई लिएर विवादमा परेका नेकपा एमालेका उम्मेदवार केशव स्थापित तेस्रो नम्बरमा छन् । उनले ३३ हजार ९७५ मत प्राप्त गरेका छन् ।

मुलुककै राजधानी काठमाण्डौमा स्वतन्त्र उम्मेदवारले अरु उम्मेदवारलाई पछाडि पारिरहँदा दलहरुप्रति जनताको वितृष्णा बढेको कतिपयले चर्चा गर्न थालेका छन् । पूर्वको सुनसरीस्थित धरान उपमहानगरपालिकामा पनि स्वतन्त्र उम्मेदवार हर्क साम्पाङ राई प्रमुख पदमा निर्वाचित भएका छन् भने सुदूरपश्चिम कैलालीको धनगढी उपमहानगरपालिकामा स्वतन्त्र उम्मेदवार गोपाल हमाल फराकिलो मतान्तरसहित विजयी भएका छन् ।