बिर्तामोड । भर्खरै सम्पन्न स्थानीय तह निर्वाचनबाट बिर्तामोड नगरपालिका वडा नम्बर ३ को वडाध्यक्षमा मदन बुढाथोकी निर्वाचित भएका छन् । बुढाथोकीले निकटतम प्रतिद्वन्दी नेपाली कांग्रेसका उम्मेदवार प्रेमप्रसाद उप्रेतीलाई पराजित गरेका हुन ।

नेकपा एमालेको तर्फबाट उम्मेदवार बनेका बुढाथोकीले झण्डै दोब्बर मतान्तरले उप्रेतीलाई पराजित गरेका छन् । नेपाली कांग्रेसका नगर सभापति तथा वडा नम्बर ३ का निवर्तमान वडाध्यक्ष र नगर प्रमुख पदका उम्मेदवार भोजराज सिटौलाको वडामा ३८ बर्षीय बुढाथोकीले २२६३ मत प्राप्त गरकेका थिए भने उप्रेतीले ११४१ मत मात्र प्राप्त गरे ।

कांग्रेसको तर्फबाट वडाध्यक्ष पदका उम्मेदवार ५९ बर्षीय उप्रेती कांग्रेसका पुराना नेता हुन् । उप्रेती २०५४ सालमा छत्रबहादुर बुढाथोकीसँग स्थानीय निकायको निर्वाचनमा तत्कालिन अनारमनी गाविस वडा नम्बर ९ को वडाध्यक्षमा प्रतिष्पर्धा गरेका थिए । सो समयमा उप्रेती र बुढाथोकी दुवै जना पराजित भएका थिए । उनीहरुलाई स्वतन्त्रबाट उम्मेदवार बनेका दिपेन्द्र पोखरेलले पराजित गरेका थिए । छत्रबहादुर बुढाथोकी मदनका बुवा हुन् । आफ्ना बुवासँग प्रतिष्पर्धा गरेका उप्रेतीलाई छोरा मदनले पराजित गरेर यो निर्वाचनबाट वडाध्यक्षमा निर्वाचित भएका हुन् ।

बुढाथोकी २०६२÷६३ को आन्दोलनताका कन्काई क्याम्पस बिर्तामोडका अनेरास्ववियुका अध्यक्ष थिए । विद्यार्थी जीवनदेखि नै राजनीतिमा सक्रिय बुढाथोकी पछिल्लो समय नेकपा एमालेको बिर्तामोड नगर समितिका उपसचिव छन् ।

सन २००७ मा अध्ययनका शिलसिलामा जापान गएर २०१४ मा नेपाल फर्केका बुढाथोकी त्यसयता बिर्तामोडमा ओएसिस एजुकेशन फाउण्डेसन सञ्चालन गर्दै आएका छन् । उनी आफैँ जापानीज भाषासमेत पढाउँदै आएका थिए । शैक्षिक परामर्श संघ झापाका उपाध्यक्षसमेत रहेका बुढाथोकी व्यवसायसँगै समाजसेवामा समेत उत्तिकै सक्रिय छन् ।