एजेन्सी । भारतमा पछिल्लो एक दिनमा २० हजारभन्दा बढीमा कोरोना भाइरसको संक्रमण पुष्टि भएको छ । भारतको स्वास्थ्य तथा परिवार कल्याण मन्त्रालयले पछिल्लो २४ घण्टामा २० हजार ४ सय ८ जनामा संक्रमण पुष्टि भएको जनाएको हो । उक्त अवधिमा ४४ जनाको कोरोना संक्रमणका कारण मृत्यु भएको छ ।

यसअघि भारतमा पछिल्लो समय दैनिक करिब २० हजारको हाराहारीमा संक्रमण पुष्टि हुने गरेको छ । भारतमा हालसम्म ४ करोड ४० लाख १ सय ३८ जनामा संक्रमण पुष्टि भइसकेको छ भने १ लाख ४३ हजार ३ सय ८४ जना संक्रमणको अवस्थामा छन् । मन्त्रालयका अनुसार पछिल्लो २४ घण्टामा २० हजार ९ सय ५८ जना संक्रमणमुक्त भएका छन् । हालसम्म कोरोना निको हुनेको संख्या करिब ४ करोड ३५ लाख पुगेको छ ।

मन्त्रालयद्वारा जारी पछिल्लो विवरणअनुसार हालसम्म ५ लाख २६ हजार ३ सय १२ जनाको मृत्यु भइसकेको छ । महामारी सुरु भएयता करिब ८७ करोडमा भाइरसको परीक्षण गरिसकिएको छ । भारतमा सन् २०२१ को जनवरी १६ देखियता २ अर्ब ९२ लाख मात्रा खोप लगाइएको छ ।