बिर्तामोड । एक दशकभन्दा लामो समयदेखि सुरक्षा गार्ड व्यवसायीको रुपमा परिचित सफल व्यवसायी रमेश बस्नेत नेकपा एमाले प्रवेश गर्ने भएका छन । पार्टी प्रवेशका लागि एमाले अध्यक्ष केपी शर्मा ओलीसँग समेत भेट गरिसकेका बस्नेत चाँडै एमालेमा प्रवेश गर्ने तयारीमा जुटेको उनी निकट श्रोतले जानकारी दिएको छ ।

पाँचथरमा जन्मिएर झापा दमकमा हुर्केका बस्नेत यतिबेला काठमाण्डौमा सेभेन स्टार सेक्युरिटी सर्भिस नामक सुरक्षा सेवा प्रदायक कम्पनी सञ्चालन गरिरहेका छन् । एमालेले भाद्र ३ गते झापाको दमकमा आयोजना गर्न लागेकोे कार्यकर्ता भेला तथा पार्टी प्रबेश कार्यक्रममा पार्टी अध्यक्ष ओलीले बस्नेतलाई स्वागत गर्ने कार्यक्रम रहेको श्रोतको भनाई छ ।

विद्यार्थी कालदेखिनै राजनितीमा सक्रिय बस्नेत नेपाल शिव सेना पार्टीको तर्फबाट २०७० सालमा तत्कालिन झापा क्षेत्र नम्बर ७ बाट केपी ओलीसँग चुनाव लडेका थिए । त्यसपश्चात उक्त पार्टीको नीति तथा गतिविधीका कारण अलग्गिएका बस्नेत अन्य दलहरुसँग समन्वयकारी भूमिकामा थिए । पछिल्लो समय उनी एमालेका नेताहरुसँग निकट रहदै आएको र पार्टी प्रवेश गर्ने अन्तिम तयारीमा रहेको श्रोतको दावी छ ।