काठमाण्डौ । अन्तर्राष्ट्रिय क्रिकेट काउन्सिल (आइसिसी)ले बुधबार सार्वजनिक गरेको एकदिवसीय वरीयतामा पाँच नेपाली खेलाडीले पूर्ववत् वरीयता गुमाएका छन् । दुई खेलाडीले वरीयतामा सुधार गरेका छन् । नेपाली टोलीका कप्तान रोहितकुमार पौडेल, दीपेन्द्रसिंह ऐरी, सोमपाल कामी, ललित राजवंशी र आसिफ शेखले वरीयता गुमाएका हुन् । नेपाली टोलीका पूर्वकप्तान सन्दीप लामिछाने र बलर करण केसीले वरीयतामा सुधार गरेका छन् ।

आइसिसीले जिम्बावेमा चलिरहेको एकदिवसीय विश्वकप ग्लोबल छनोट प्रतियोगितामा गरेको प्रदर्शनका आधारमा वरीयतासँगै रेटिङ प्रदान गरेको हो । पहिलोपटक ग्लोबल छनोटमा पुगेको नेपाल सुपर सिक्ससम्म पुग्न सकेन । आयरल्यान्डसँग दुई विकेटले पराजित हुँदा नेपाल १० टोली सहभागी ग्लोबल छनोटमा आठौँ स्थानमा रह्यो । जिम्बावेमा बलर र ब्याट्सम्यानले स्तरीय प्रदर्शन गर्न नसक्दा नेपालले समूह ‘ए’मा चारमध्ये एक खेलमा जित निकाल्यो । समूह चरणमा नेपालले अमेरिकालाई हराएको थियो भने जिम्बावे, नेदरल्यान्ड र वेस्ट इन्डिजसँग पराजित भयो ।

सन्दीप र करणको सुधार

ग्लोबल छनोटको पछिल्ला खेलमा सन्दीप लयमा देखिए । उनले बलिङसँगै ब्याटिङमा समेत राम्रो प्रदर्शन गरे । एकदिवसीय क्रिकेटमा छिटो सय विकेट पूरा गरेका उनी जुलाईको बलिङ वरीयतामा २४औँ स्थानमा रहेका छन् । ५६८ रेटिङ पाएका उनले एक स्थान सुधार गरेका हुन् । सन्दीपले ग्लोबल छनोटको ६ खेलमा सात विकेट लिए । उनले चार मेडन ओभर बलिङ गरे ।

एकदिवसीय विश्वकप ग्लोबल छनोटमा ब्याटिङ र बलिङमा खराब प्रदर्शन गरेपछि नेपाली खेलाडीको आइसिसी वरीयता खस्कियो

सोमपाल कामी घाइते भएपछि नेपालको ओपनिङ बलिङमा दबाब सामना गरेका करण बलिङ वरीयताको ८५औँ स्थानमा रहे । ४२१ रेटिङ पाएका उनले दुई स्थान सुधार गरेका हुन् । उनले ग्लोबल छनोटमा ६ खेलमा १२ विकेट लिए । छनोटमा सर्वाधिक विकेट लिने सूचीमा उनी आठौँ स्थानमा छन् ।  दीपेन्द्र पाँच र शेख चार स्थान तल

अलराउन्डर भूमिका निर्वाह गर्ने दीपेन्द्रले एकदिवसीय वरीयतामा पाँच स्थान गुमाएका छन् । अघिल्लोपटक ५७औँ स्थानमा रहेका उनी यसपटक ६२औँ स्थानमा झरेका छन् । नेपाली खेलाडीमध्ये धेरै स्थान गुमाउनेमा उनी अगाडि छन् । दीपेन्द्रले ४७० रेटिङ पाएका छन् । ग्लोबल छनोटमा उनले ६ खेलमै बलिङ गरी चार विकेट लिए । दीपेन्द्रपछि धेरै स्थान गुमाउने आसिफ शेख हुन् । यसपटक चार स्थान गुमाउँदा उनी ७७औँ स्थानमा रहे । शेखले ४७५ रेटिङ पाएका छन् । यसैगरी, कप्तान रोहितले ब्याटिङमा एक स्थान गुमाएका छन् । ४८० रेटिङ अंक पाएका उनी यसपटक ७३औँ स्थानमा रहे । बलिङ वरीयतामा सोमपाल कामी ४२७ रेटिङका साथ ७८ स्थानमा छन् ।

उनले दुई स्थान गुमाएका छन् । यसैगरी ललित राजवंशी एकदिवसीय बलिङ वरीयतामा ९८औँ स्थानमा रहे । एक स्थान गुमाएका उनले ३८८ अंक प्राप्त गरे । ललितले छनोट खेलमा तीन खेलमा बलिङ गरी चार विकेट लिएका थिए । आसिफले ग्लोबल छनोटको चार खेलमा १०६ रन जोडेका थिए ।