बिर्तामोड । झापामा पहिलोपल्ट ‘जिल्ला स्तरीय डोरीतान आउटडोर च्याम्पियनसीप २०८०’ सम्पन्न भएको छ । शुक्रबार सम्पन्न प्रतियोगिताको उपाधि कचनकवल गाउँपालिकाले जितेको छ ।

बिर्तामोड–३ बिर्ताबजारस्थित अनारमनी पव्लिक क्याम्पसको खेलमैदानमा भएको प्रतियोगिताको फाइनल खेलमा बुद्धशान्ति गाउँपालिकालाई २–१ ले पराजित गरी कचनकवलले उपाधि जितेको हो । पहिलो सेट कचनकवलले जितेको थियो भने दोस्रो सेट बुद्धशान्तिले जित्दै बराबरी गरेको थियो । फेरि तेस्रो सेट कचनकवलले जितेर उपाधि रक्षा गरेको हो ।

विजेता कचनकवलले नगद ३१ हजार, ट्रफी, मेडल र प्रमाणपत्र पाएको छ भने उपविजेता बुद्धशान्तिले नगद २१ हजार, ट्रफी, मेडल र प्रमाणपत्र प्राप्त गरेको आयोजक जिल्ला डोरीतान संघ झापाकी अध्यक्ष युनिता दवाडीले जानकारी दिइन् । प्रतियोगितामा कचनकवल, बुद्धशान्ति, गौरादह, हल्दिवारी, मेचीनगर, भद्रपुर, बिर्तामोड, नेपाल प्रहरी र सशस्त्र प्रहरी गरी ९ टीमको सहभागिता रहेको थियो ।