भद्रपुर । झापाको भद्रपुरमा जारी ओम साई पाथिभरा हस्पिटल प्रालि प्रथम अन्तर पालिका जिल्लास्तरीय लिग तथा नकआउट फुटबल प्रतियोगिता अन्तर्गत भएको पहिलो खेलमा मेचीनगर नगरपालिका विजयी भएको छ ।

आज भएको पहिलो खेलमा मेचीनगरले बाह्रदशी गाउँपालिकालाई हराएको हो । जितसँगै मेचीनगरको ६ अंक भएको छ । समान दुई खेल खेलेको बाह्रदशीको १ अंक छ ।

मेचीनगरले बाह्रदशीलाई ३–० गोल अन्तरले हराएको हो । भद्रपुर झापा गोल्डकपको आयोजनामा मेची रंगशालामा भएको खेलको २८ औँ मिनेटमा मेचीनगरका अरुण मेचेले गोल गरे । त्यस्तै, खेलको ५८ औँ र ६५ औँ मिनेटमा निरज कार्कीले गोल गरेर जित निश्चित बनाए ।

खेलको प्लेयर अफ दि म्याच मेचीनगरका निरज कार्की भए । उनलाई गोल्डकपका अध्यक्ष दिपेश ढकाल, बुद्धशान्ति गाउँपालिकाका अध्यक्ष मनोज प्रसाईं, समाजसेवी पवन श्रेष्ठले नगद दुई हजार र ट्रफी प्रदान गरे ।

यसैबीच, आज भएको बिर्तामोड नगरपालिका र बुद्धशान्ति गाउँपालिकाबीचको दोस्रो खेल बराबरीमा टुंगियो । दुवै टिमबाट गोल हुन नसकेपछि अंक बाँड्न बाध्य भए ।

यसैबीच, आजको खेलसँगै समूह क को लिग चरण सकिएको छ । यो समूहबाट हल्दिबारी बाहिरिएको छ । बुद्धशान्ति ४ अंकका साथ समूह विजेता बनेको छ भने बिर्तामोड २ अंक जोड्दै उपविजेतामा सीमित रह्यो ।

खेलको प्लेयर अफ दि म्याच बुद्धशान्तिका पवन नेपाली दर्जी भए । उनलाई गोल्डकपका अध्यक्ष दिपेश ढकाल, झापा ११ एफसीका अध्यक्ष जलकुमार गुरुङंले नगद दुई हजार र ट्रफी प्रदान गरे ।