बिर्तामोड । झापाको बिर्तामोडमा प्रधान कार्यालय रहेको हाम्रो नेपाल बचत तथा ऋण सहकारी संस्था शेयर सदस्यहरुको विभिन्न सामाजिक संस्कार, उत्सव तथा अप्ठ्यारोमा सारथी बन्दै आएको छ । साकोसद्वारा बुधबार आयोजित ११औँ बार्षिक साधारणसभा तथा अन्तिम माइन्युट प्रमाणीकरण कार्यक्रममा सार्वजनिक गरेको प्रतिवेदनमार्फत उक्त सेवा सुविधाबारे जानकारी गराएको हो ।

संस्थाका अध्यक्ष भवानीप्रसाद दंगालले सहकारी मुनाफा कमाउन मात्र होइन सदस्यहरुको हरेक सुखदुखमा साथ दिनपनि तयार हुनु पर्ने बताए । कार्यक्रममा अध्यक्षको तर्फबाट प्रतिवेदन प्रस्तुत गर्दै उनले शेयर सदस्यको जन्मदेखि मृत्युसम्मको संस्कारमा सहकारीले सहयोग गर्ने गरेको जानकारी दिए । साकोसले गत आवमा ३७८ जनालाई सुत्केरी सुविधामार्फत ३७८ जनालाई ४ लाख ६६ हजार ३७० रुपैँया, १७३ जना नवजात शिशुलाई न्यानो कपडा सुविधा अन्तर्गत १ लाख ७१ हजार, ४२९ जना सुत्केरी सदस्यलाई न्यानो कपडाबापत ४ लाख २८ हजार ४३२ रुपैँया, सदस्यको जन्मदिनमा ३ हजार ३१२ जनालाई १६ लाख २६ हजार ५५० रुपैँयाको केक उपहार प्रदान गरेको जनाएको छ ।

त्यस्तै २१३ जना सदस्यको वैवाहिक बर्षगाँठमा उपहार स्वरुप १ लाख ५ हजार छ सय, मृत्यु राहत सुविधा स्वरुप २ जना बाल बचतकर्तालाई १२ हजार पाँच सय रुपैँया, ४१७ जनालाई समवेदना र १४९ जनालाई किरिया खर्च तथा मृत्यु राहत बापत १२ लाख ६८ हजार ४३५ रुपैँया र २० जना कर्मचारीको शुभकार्य उपहार बापत ५ लाख १७ हजार २२४ रुपैँया उपलब्ध गराइएको साकोसका अध्यक्ष दंगालले जानकारी दिए ।

संस्थाले सामाजिक उत्तरदायित्व अन्तर्गत गत आवमा विभिन्न व्यक्ति तथा संस्थालाई ५ लाख १७ हजार २२४ रुपैँया सहयोग प्रदान गरेको जनाएको छ भने सदस्य उपचार कोष अन्तर्गत ३२ जना सदस्यलाई ४ लाख ६५ हजार ७९४ रुपैँया उपलब्ध गराएको जनाएको छ ।

गत आवमा साकोसले ६ जना ऋणीहरुलाई ऋण सुरक्षण कोष अन्तर्गत ४ लाख १६ हजार तीन सय रुपैँया ऋण मिनाहा गरेको उपाध्यक्ष राजेन्द्र गौतमले जानकारी दिए ।

एघार बर्ष अघि शुरु भएको साकोसमा हाल २०९८६ महिलासहित ३५८८४ जना शेयर सदस्य रहेको र १८ करोड ७ लाख ४८ हजार सात सय रुपैँया शेयर पूँजी रहेको छ । इलाम, झापा र मोरंग कार्यक्षेत्र रहेको साकोसले २२ पालिकाको ३१ वटा सेवाकेन्द्र मार्फत गत आवमा १ अर्ब १४ करोड ११ लाख ६४ हजार ५९ रुपैँया बचत/निक्षेप संकलन गरेको जनाएको छ । संस्थाको ७३ करोड २८ लाख ७५ हजार ९६ रुपैँया बाह्य ऋण रहेको र ४ लाख ९७ हजार ५४६ रुपैँया सञ्चालन मुनाफा गरेको जनाएको छ । साकोसको गत आवको वासताल २ अर्ब १६ करोड ३९ लाख १९ हजार ५९५ रुपैँया बराबरको रहेको छ ।