बिर्तामोड । ऐन बिपरित लेबल टाँसेर बजारमा फिनेल बिक्री भइरहेको पाइएको छ । उपभोक्ता संरक्षण ऐनमा तोकिएको मापदण्ड विपरित लेबल राखेर केमिकलजन्य पदार्थ फिनेल बिक्री भएको पाइएको हो ।

रोयल केमिकल हाउसले उत्पादन गरेको फिनेलको लेबलमा ऐनले तोके बमोजिम उत्पादकको ठेगाना र उद्योगको दर्ता नम्बरसमेत उल्लेख नगरी बिक्री भइरहेको पाइएको हो । उपभोक्ता संरक्षण ऐन २०७५ को दफा ६ को उपदफा २ (क) मा उत्पादकले आफुले उत्पादन गरेको वस्तुको लेबलमा उत्पादकको नाम, ठेगाना र उद्योगको दर्ता नम्बर उल्लेख गर्नु पर्ने स्पष्ट व्यवस्था गरेको छ । तर रोयल केमिकल हाउसले उत्पादन गरेको लाइफ लाइन फिनेलको लेबलमा उत्पादकको नाम बाहेक अरु केहि उल्लेख गरिएको छैन ।

सो ऐनको दफा ३८ (क) अनुसार ऐनमा व्यवस्था भए बमोजिम लेबलिङ नगरेमा कसुर गरेको ठहरिने उल्लेख छ भने दफा ४० (क) मा सो कसुर गरे वा गराएमा तीन महिनासम्म कैद वा पचास हजार रुपैँयासम्म जरिवाना वा दुवै गर्न सकिने उल्लेख छ ।   

एक लिटर परिमाण उल्लेख गरिएको सो बोत्तलको लेबलमा आरपी डिस्ट्रीव्युटर ट्रेड सेन्टर विक्रेता रहेको उल्लेख गरिएको छ भने सतासी बहुमुखी सहकारी संस्था लिमिटेडले सञ्चालन गरेको पसलसमेतबाट बिक्री भइरहेको छ ।