बिर्तामोड । त्रिभुवन आर्मी फुटबल क्लब झापाको बिर्तामोडस्थित डोमालाल राजवंशी रंगशालामा जारी अर्ना छैटौं झापा गोल्डकपको सेमिफाइनलमा प्रवेश गरेको छ । बुधबार भएको खेलमा मच्छिन्द्र फुटबल क्लबलाई २–१ गोल अन्तरले पराजित गर्दै त्रिभुवन आर्मी सेमिफाइनल प्रवेश गरेको हो ।

आर्मीका लागि खेलको ६१ औं मिनेटमा नवयुग श्रेष्ठ र ८० औं मिनेटमा बसन्त जिम्बाले गोल गरे ।

उत्कृष्ट प्रदर्शन गर्दै मच्छिन्द्रले खेलमा सुरुवाती अग्रता लिएको थियो । मच्छिन्द्रका लागि खेलको १०औँ मिनेटमा हिसुब थपलियाको उत्कृष्ट पासमास्टेफन्स विनोङ्सले गोल गरेका थिए । पहिलो हाफमा कमजोर देखिएको आर्मीले दोस्रो हाफमा मच्छिन्द्रलाई निरन्तर दबाबमा राख्न सफल भयो । दोस्रो हाफमा मच्छिन्द्रले राम्रो फिनिसङ गर्न सकेन । चार पटकको झापा गोल्डकप विजेता आर्मीे उपाधिको दाबेदार मानिन्छ ।

जितसँगै आर्मीले फाइनल प्रवेशका लागि अर्को विभागीय टोली एपीएफ फुटबल क्लबसँग शुक्रबार खेल्नेछ ।

आजको खेलको अफ द म्याच आर्मीका बसन्त जिम्बा भए । उनले नगद ११ हजार प्राप्त गरे ।

बिहीबार आयोजक झापा–११ एन्फा मकवानपुर फुटबल क्लबबीच अन्तिम क्वाटरफाइनल खेल हुनेछ ।