झापा । लामो समयपछि संसदीय व्यवस्था स्वीकारेका नेपाल कम्युनिस्ट पार्टीका महासचिव नेत्रविक्रम चन्द ‘विप्लव’ले देशको कार्यकारी प्रमुख भएर सेवा गर्ने आफ्नो चाहना रहेको खुलासा गरेका छन् ।

काठमाण्डौमा शनिबार आयोजित ‘जेनजी’ सँगको अन्तरक्रियामा बोल्दै उनले आगामी निर्वाचनमा आफ्नो पार्टी पनि चुनावी मैदानमा उत्रिने र जनताले विश्वास गरेमा प्रधानमन्त्री बनेर देशको मुहार फेर्ने संकल्प गरेका हुन् । विगतमा बन्दुक बोकेको, जेल बसेको र किताब पढेको अनुभव सुनाउँदै उनले अब नयाँ उद्योगधन्दा चलाएर र काम गरेर देश बनाउने योजना रहेको बताए ।

‘यो देशलाई राम्रो बनाउने हाम्रो सपना छ । हामीले बन्दुक पनि बोक्यौ,जेल पनि गयौँ,किताव पनि पढ्यौँ । अहिले नयाँ उद्योगधन्दा पनि चलाउँछौँ, काम गर्छौँ । यदी नेपालका किसान, मजदुर, बद्धिजिवी, व्यापारी, मध्यम वर्गले, शहरले, गाउँले हामीलाई मौका दिनुहुन्छ भने तिमीहरु एक चोटी गरेर देखाउ न भनेर तपाईहरुले जिम्मा दिनुहुन्छ भने एकचोटी यो देशको प्रधानमन्त्री भएर, कार्यकारी प्रमुख भएर गोरु जस्तो जोतेर देशको सेवा गर्ने चाहना पनि नेकपा माओवादीको छ, यो हामी गर्छौँ,’ उनले भने ।

महासचिव विप्लवले आगामी फागुन २१ का लागि तय गरिएको निर्वाचन हुनेमा भने गम्भीर शंका व्यक्त गरेका छन् । सुशीला कार्की नेतृत्वको वर्तमान सरकारले निर्वाचन गराउने कुरामा कसैको विश्वास नरहेको टिप्पणी गर्दै उनले प्रहरी र कर्मचारीको खस्किएको मनोबल, लुटिएका हतियार फिर्ता नहुनु र राज्यसँग रकमको अभाव जस्ता कारणले चुनाव अनिश्चित रहेको दाबी गरे।

आन्दोलनका क्रममा प्रहरीमाथि भएको हिंसाले उनीहरूको मनोबल गिरेको र १६ सय हतियार अझै फिर्ता नभएको भन्दै यस्तो अवस्थामा शान्तिपूर्ण निर्वाचन चुनौतीपूर्ण रहेको उनको तर्क छ ।

मुलुकको निकासका लागि सर्वपक्षीय अन्तरिम सरकार गठन गर्नुपर्ने र प्रत्यक्ष निर्वाचित कार्यकारी राष्ट्रपति वा प्रधानमन्त्रीको व्यवस्थामा जानुपर्ने विप्लवको माग छ । ‘जेनजी’ पुस्ताले पनि प्रत्यक्ष निर्वाचित कार्यकारी नै खोजेको भन्दै उनले नयाँ शक्तिहरूको उदय हुनुपर्ने समयमा पुराना शक्तिहरू सलबलाउन थालेकोमा चिन्ता जनाए । वर्तमान सरकारले भ्रष्टाचारीलाई कारबाही गर्ने युवाहरूको माग पूरा गर्न नसकेको आरोप लगाउँदै उनले अबको निर्वाचनमा युवा पुस्तालाई साथै लिएर देशभरि अपील गर्ने र परिवर्तनको नेतृत्व लिने उद्घोष गरे ।