बिर्तामोड । झापाका दुई फरक स्थानमा दुई जना मानिसको मृत्यु भएको छ । मेचीनगरमा एक जना र गौरादहमा एक जनाको मृत्यु भएको हो ।

शुक्रबार राति १०ः३० बजे गौरादह ५ चान्दुखोलास्थित भित्री सडक खण्डमा बालुबथानबाट फकितिप गाउँतर्फ जाँदै गरेको ट्याक्टर दुर्घटनामा परि ट्याक्टरमा सवार गौरादह ७ का ३५ बर्षीय मोहमद माजिमको मृत्यु भएको हो । मे १ त ७१०८ नम्बरको ट्याक्टर आफै अनियन्त्रित भई दुर्घटना हुँदा सख्त घाइते माजिमलाई उपचारका लागि दमक अस्पताल लगिएकोमा अस्पताल पुर्याउनासाथ चिकित्सकले मृत घोषणा गरेको प्रहरीले जनाएको छ ।

उक्त ट्याक्टर दुर्घटनामा परि गौरादह ७ का ४९ बर्षीय सत्यनारायण राजवंशी, २३ बर्षीय सञ्जित ऋषिदेव, २३ बर्षीय अभिजुल मिया र ३४ बर्षीय केलु मिया घाइते भइ दमक अस्पतालमा उपचार भइरहेको जिल्ला प्रहरी कार्यालय झापाका सुचना अधिकारी डीएसपी खगेन्द्रबहादुर खड्काले जानकारी दिए ।

ट्याक्टर चालक स्थानीय ३८ बर्षीय यमप्रसाद राजवंशी तत्काल फरार भएको र खोजी कार्य जारी रहेको प्रहरीले जनाएको छ ।  

त्यस्तै झापाको मेचीनगर ७ प्यारीभिट्टास्थित बसपार्कमा बिग्रिएर थन्क्याइएको को १ ख नम्बरको बसभित्र सुतेको अवस्थामा सोहि स्थानमा मागिखाने अन्दाजी ४०/४२ बर्षीय तम्बु भनिने तत्काल नामथर वतन नखुलेको पुरुष शनिबार विहान अन्दाजी ७ः१५ बजे मृत फेला परेको प्रहरीले जनाएको छ ।