बिर्तामोड । प्रत्येक बर्ष होलीको दिन गुञ्जायमान हुने झापाको बिर्तामोड यस बर्ष सुनसान देखिएको छ ।

निर्वाचनको मौन अवधि शुरु भएका कारण प्रशासनले गरेको कडाई र आजै लाग्ने ग्रहणका कारण सदाझै चोक चोकमा होली खेल्नेहरुको भीड यो बर्ष भएन । बिर्तामोडको सिटी सेन्टरलगायत अन्य चोक तथा गल्लीहरुमा अघिल्ला बर्षहरुमा होली खेल्नेहरुको भीड लाग्ने गर्दथ्यो । युवायुवतीहरु होलीको रंग र सांगितिक कार्यक्रममा झुम्ने गर्दथे । तर यस बर्ष भने यहाँको माहोल विल्कुल फरक देखिएको छ । छिटफुट बाहेक मानिसहरुले होली खेलेनन् । गाउँ घरमा सामान्य होली खेलेपनि चोकमा भिडभाड देखिएन ।

सानो सख्ंयामा चोक आएका युवायुवतीहरु भने विगतको होलीको उमङ्ग खोजिरहेको देखिन्थे । तर, यहाँको माहोल भने उनीहरुले खोजे जस्तो विल्कुल थिएन ।

प्रत्येक बर्ष होलीको दिन ट्राफिक प्रहरीले सयौँ सवारी साधन पक्राउ गरेर कारबाही गर्दथ्यो । यो समाचार तयार पार्दासम्म जिल्लामा कुनै सवारी साधनलाई कारबाही गर्नु नपरेको जिल्ला ट्राफिक प्रहरी कार्यालय झापाले जनाएको छ । होलीको दिन मादक पदार्थ सेवन गरेर सवारी चलाउने, हेल्मेट नलगाउने, मोटरसाइकलमा तीन जना चढ्ने जस्ता ट्राफिक नियम उल्लंघन गर्नेको संख्या ठूलो हुने गर्दथ्यो । त्यस्ता सवारीलाई प्रहरीले नियन्त्रणमा लिएर साँझमात्र छाड्ने गरेकोमा यो बर्ष कुनै सवारीसाधनले ट्राफिक नियम उल्लंघन नगरेको प्रहरीको भनाई छ ।